Священник: Благослове́н Бог наш всегда́, ны́не и при́сно, и во ве́ки веко́в.
Чтец: Ами́нь. Сла́ва Тебе́, Бо́же наш, сла́ва Тебе́.
Клир поет: Царю́ Небе́сный: Чтец: Трисвятое. Пресвята́я Тро́ице: О́тче наш: Священник: Я́ко Твое́ есть Ца́рство: Чтец: Ами́нь. Го́споди, поми́луй, 12. Прииди́те, поклони́мся: трижды.
И псалом 33:
Благословлю́ Го́спода на вся́кое вре́мя, вы́ну хвала́ Его́ во усте́х мои́х. О Го́споде похва́лится душа́ моя́, да услы́шат кро́тцыи и возвеселя́тся. Возвели́чите Го́спода со мно́ю и вознесе́м и́мя Его́ вку́пе. Взыска́х Го́спода и услы́ша мя, и от всех скорбе́й мои́х изба́ви мя. Приступи́те к Нему́ и просвети́теся, и ли́ца ва́ша не постыдя́тся. Сей ни́щий воззва́, и Госпо́дь услы́ша и́, и от всех скорбе́й eго́ спасе́ и́. Ополчи́тся А́нгел Госпо́день о́крест боя́щихся Его́, и изба́вит их. Вкуси́те и ви́дите, я́ко благ Госпо́дь; блаже́н муж, и́же упова́ет Нань. Бо́йтеся Го́спода, вси святи́и Его́, я́ко несть лише́ния боя́щимся Его́. Бога́тии обнища́ша и взалка́ша, взыска́ющии же Го́спода не лиша́тся вся́каго бла́га. Прииди́те, ча́да, послу́шайте мене́, стра́ху Госпо́дню научу́ вас. Кто́ есть челове́к хотя́й живо́т, любя́й дни ви́дети бла́ги? Удержи́ язы́к твой от зла, и устне́ твои́, е́же не глаго́лати льсти. Уклони́ся от зла, и сотвори́ бла́го. Взыщи́ ми́ра, и пожени́ и́. О́чи Госпо́дни на пра́ведныя, и у́ши Его́ в моли́тву их. Лице́ же Госпо́дне на творя́щия зла́я, е́же потреби́ти от земли́ па́мять их. Воззва́ша пра́веднии, и Госпо́дь услы́ша их, и от всех скорбе́й их изба́ви их. Близ Госпо́дь сокруше́нных се́рдцем, и смире́нныя ду́хом спасе́т. Мно́ги ско́рби пра́ведным, и от всех их изба́вит я́ Госпо́дь. Храни́т Госпо́дь вся ко́сти их, ни еди́на от них сокруши́тся. Смерть гре́шников люта́, и ненави́дящии пра́веднаго прегре́шат. Изба́вит Госпо́дь ду́шы раб Свои́х, и не прегреша́т вси, упова́ющии на Него́.
Слава, и ныне: Аллилу́иа, трижды.
Таже ектения великая.
Диакон: Ми́ром Го́споду помо́лимся.
Лик: Го́споди, поми́луй.
О свы́шнем ми́ре и спасе́нии душ на́ших, Го́споду помо́лимся.
Лик: Го́споди, поми́луй.
О ми́ре всего́ мiра, благостоя́нии святы́х Бо́жиих церкве́й и соедине́нии всех, Го́споду помо́лимся.
Лик: Го́споди, поми́луй.
О Вели́ком Господи́не и отце́ на́шем Святе́йшем Патриа́рхе (имярек), и о господи́не на́шем преосвяще́ннейшем митрополи́те (или архиепи́скопе, или епи́скопе) (имярек), честне́м пресви́терстве, во Христе́ диа́констве, о всем при́чте и лю́дех, Го́споду помо́лимся.
Лик: Го́споди, поми́луй.
О Богохрани́мей стране́ на́шей, власте́х и во́инстве ея́, Го́споду помо́лимся.
Лик: Го́споди, поми́луй.
О граде́ сем (или о ве́си сей, или о святе́й оби́тели сей), вся́ком гра́де, стране́ и ве́рою живу́щих в них, Го́споду помо́лимся.
Лик: Го́споди, поми́луй.
О бла́горастворе́нии возду́хов, о изоби́лии плодо́в земны́х и вре́менех ми́рных, Го́споду помо́лимся.
Лик: Го́споди, поми́луй.
О пла́вающих, путеше́ствующих, неду́гующих, стра́ждущих, плене́нных и о спасе́нии их, Го́споду помо́лимся.
Лик: Го́споди, поми́луй.
И прилагает сия: О е́же низпосла́ти на отроко́в сих ду́ха прему́дрости и ра́зума, и отве́рзти ум и уста́, и просвети́ти сердца́ их к прия́тию наказа́ния до́брых уче́ний, Го́споду помо́лимся.
Лик: Го́споди, поми́луй.
О е́же всади́ти в сердца́ их нача́ло прему́дрости, страх Свой Боже́ственный и тем бу́есть ю́ности отгна́ти от серде́ц их, и просвети́ти ум их, е́же уклони́тися от зла и твори́ти благо́е, Го́споду помо́лимся.
Лик: Го́споди, поми́луй.
О е́же отве́рзти ум их, е́же прия́ти и разуме́ти, и па́мятствовати вся до́брая и душеполе́зная уче́ния, Го́споду помо́лимся.
Лик: Го́споди, поми́луй.
О е́же пода́ти им приседя́щую Престо́лу Его́ прему́дрость, и всади́ти ю́ в сердца́ их, я́ко да научи́т их, что есть благоуго́дное пред Ним, Го́споду помо́лимся.
Лик: Го́споди, поми́луй.
О е́же преспе́ти им прему́дростию и во́зрастом в сла́ву Бо́жию, Го́споду помо́лимся.
Лик: Го́споди, поми́луй.
О е́же бы́ти им прему́дростию и доброде́тельным житие́м, и благостоя́нием в правосла́вней ве́ре, ра́дость и утеше́ние роди́телем свои́м, и це́ркви Правосла́вно–кафоли́честей утвержде́ние, Го́споду помо́лимся.
Лик: Го́споди, поми́луй.
О е́же изба́витися им и нам от вся́кия ско́рби, гне́ва и ну́жды Го́споду помо́лимся.
Лик: Го́споди, поми́луй.
Заступи́, спаси́, поми́луй и сохрани́ нас, Бо́же, Твое́ю благода́тию.
Лик: Го́споди, поми́луй.
Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю со все́ми святы́ми помяну́вше, са́ми себе́, и друг дру́га, и весь живо́т наш Христу́ Бо́гу предади́м.
Лик: Тебе́, Го́споди.
Священник возглашает: Я́ко подоба́ет Тебе́ вся́кая сла́ва, честь и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Лик: Ами́нь.
Посем тропари сия, глас 6:
Я́ко посреде́ ученико́в Твои́х / прише́л еси́, Спа́се, / мир дая́ им, / прииди́ и к нам, и спаси́ нас.
Безкни́жныя ученики́ / Дух Твой Святы́й наказа́тели показа́, Христе Боже, / и многовеща́нным сли́чеством язы́к / пре́лести ума́ли, я́ко всеси́лен.
Слава, тропарь, глас 8: Благослове́н еси́, Христе́ Бо́же наш, / И́же прему́дры ловцы́ явле́й, / низпосла́в им Ду́ха Свята́го, / и те́ми уловле́й вселе́нную, / Человеколю́бче, сла́ва Тебе́.
И ныне, глас 6: Предста́тельство христиа́н непосты́дное, / хода́тайство ко Творцу́ непрело́жное, / не пре́зри гре́шных моле́ний гла́сы, / но предвари́, я́ко Блага́я, на по́мощь нас, / ве́рно зову́щих Ти, / ускори́ на моли́тву и потщи́ся на умоле́ние, / предста́тельствующи при́сно, Богоро́дице, чту́щих Тя.
Диакон: Во́нмем.
Священник: Мир всем.
Лик: И ду́хови твоему́.
Диакон: Прему́дрость, во́нмем.
Прокимен, глас 4–й:
Из уст младенец и ссущих / совершил еси хвалу. Стих: Возрадуется сердце мое о спасении твоем.
Диакон: Прему́дрость.
Чтец: К Ефеся́нам посла́ния свята́го апо́стола Па́вла чте́ние.
Диакон: Во́нмем.
Апостол к Ефесянам, зачало 218, 223 [Еф. 1:16–19, 3:19–21].
Бра́тие, не престаю́ благодаря́ о вас, помина́ние о вас творя́ в моли́твах мои́х. Да Бог Го́спода на́шего Иису́са Христа́, Оте́ц сла́вы даст вам Ду́ха прему́дрости и открове́ния, в позна́ние Его́. Просвеще́нна очеса́ се́рдца ва́шего, я́ко уве́дети вам, ко́е есть упова́ние зва́ния Его́, и ко́е бога́тство сла́вы достоя́ния Его́ во святы́х. И ко́е преспе́ющее вели́чество си́лы Его́ в нас, ве́рующих по де́йству держа́вы кре́пости Его́. Да возмо́жете разуме́ти преспе́ющую ра́зум любо́вь Христо́ву, да испо́лнитеся во вся́ко исполне́ние Бо́жие. Могу́щему же па́че вся твори́ти по преизбы́точествию, и́хже про́сим или́ разуме́ем; по си́ле де́йствуемой в нас. Тому́ сла́ва в Це́ркви о Христе́ Иису́се, во вся ро́ды ве́ка веко́в. Ами́нь.
Священник: Мир ти.
Чтец: И ду́хови твоему́.
И посем возглашает диакон: И о сподо́битися нам слы́шанию свята́го Ева́нгелия Го́спода Бо́га мо́лим.
Лик: Го́споди, поми́луй, трижды.
Диакон: Прему́дрость, про́сти, услы́шим свята́го Ева́нгелия.
Священник: Мир всем.
Лик: И ду́хови твоему́.
Священник: От Ма́рка свята́го Ева́нгелия чте́ние.
Лик: Сла́ва Тебе́, Го́споди, сла́ва Тебе́.
Диакон: Во́нмем.
Евангелие от Марка, зачало 44 [Мк. 10:13–16].
Во вре́мя о́но, приноша́ху ко Иису́сови де́ти, да ко́снется их: ученицы́ же преща́ху принося́щим. Ви́дев же Иису́с, негодова́, и рече́ им: оста́вите дете́й приходи́ти ко Мне, и не брани́те им, таце́х бо есть Ца́рствие Бо́жие. Ами́нь глаго́лю вам, и́же а́ще не прии́мет Ца́рствия Бо́жия я́ко отроча́, не и́мать вни́ти в не́. И объе́м их, возло́жь ру́це на них, благословля́ше их.
Лик: Сла́ва Тебе́, Го́споди, сла́ва Тебе́.
Таже ектения:
Диакон: Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.
Лик: Го́споди, поми́луй, трижды.
Еще́ мо́лимся о Вели́ком Господи́не и отце́ на́шем Святе́йшем Патриа́рхе имярек, и о господи́не на́шем преосвяще́ннейшем митрополи́те [или архиепи́скопе, или епи́скопе] имярек [егоже есть область], и о всей во Христе́ бра́тии на́шей.
Лик: Го́споди, поми́луй, трижды.
Еще́ мо́лимся о Богохрани́мей стране́ на́шей, власте́х и во́инстве ея́, да ти́хое и безмо́лвное житие́ поживе́м во вся́ком благоче́стии и чистоте́.
Лик: Го́споди, поми́луй, трижды.
Еще́ мо́лимся Го́споду Бо́гу на́шему, о е́же призре́ти ми́лостивно на отроко́в сих, и низпосла́ти в сердца́, во ум и во уста́ их Ду́ха прему́дрости, ра́зума же и благоче́стия, и стра́ха Своего́, и просвети́ти их све́том Своего́ богоразу́мия, и пода́ти им си́лу и кре́пость, во е́же ско́ро прия́ти и спе́шно навы́кнути Боже́ственнаго зако́на Его́ наказа́нию, и всему́ благо́му и поле́зному уче́нию; е́же преуспева́ти им прему́дростию и ра́зумом, и все́ми благи́ми де́лы в сла́ву Пресвята́го Его́ и́мени, и дарова́ти им здра́вие, и долголе́тны их сотвори́ти к созида́нию и сла́ве Це́ркве Своея́, рцем вси: Го́споди, услы́ши и ми́лостивно поми́луй.
Лик: Го́споди, поми́луй, 12.
Священник же возглашает: Услы́ши ны, Бо́же, Спа́сителю наш, упова́ние всех конце́в земли́ и су́щих в мо́ри дале́че, и ми́лостив, ми́лостив бу́ди, Влады́ко, о гресе́х на́ших, и поми́луй ны. Ми́лостив бо и человеколю́бец Бог еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.
Лик: Ами́нь.
Диакон: Го́споду помо́лимся.
Лик: Го́споди, поми́луй.
Священник глаголет молитву сию:
Го́споди, Бо́же и Созда́телю наш, о́бразом Свои́м почты́й нас челове́ки, научи́вый избра́нныя Твоя́, я́ко диви́тися вне́млющым уче́нию Твоему́, откры́вый прему́дрость младе́нцем; и́же Соломо́на и всех взыску́ющих прему́дрости Твое́й научи́вый, отве́рзи сердца́, умы́ и уста́ рабо́в Твои́х сих, во е́же прия́ти си́лу зако́на Твоего́, и со успе́хом позна́ти преподае́мая им поле́зная уче́ния, в сла́ву Пресвята́го и́мене Твоего́, в по́льзу и созида́ние Святе́й Твое́й Це́ркви, и разуме́ти благу́ю и соверше́нную во́лю Твою́. Изба́ви их от вся́каго нало́га вра́жия, соблюди́ их в Правосла́вии и ве́ре, и во вся́ком благоче́стии и чистоте́ во вся дни живота́ их, да преуспе́ют в ра́зуме и во исполне́нии за́поведей Твои́х; да та́ко предугото́вани просла́вят Пресвято́е и́мя Твое́, и бу́дут насле́дницы Ца́рствия Твоего́. Я́ко Ты еси́ Бог си́лен в ми́лости, и благ в кре́пости, и Тебе́ подоба́ет вся́кая сла́ва, честь и поклоне́ние, Отцу́, и Сы́ну, и Свято́му Ду́ху, всегда́, ны́не и при́сно, и во ве́ки веко́в, ами́нь.
Диакон: Прему́дрость.
[Священник: Пресвята́я Богоро́дице, спаси́ нас.]
Лик: Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.
Священник: Сла́ва Тебе́, Христе́ Бо́же, упова́ние на́ше, сла́ва Тебе́.
Лик: Сла́ва, и ны́не: Го́споди, поми́луй, трижды. Благослови́.
Священник творит отпуст:
[В неделю: Воскресы́й из ме́ртвых,] Христо́с, и́стинный Бог наш, моли́твами Пречи́стыя Своея́ Ма́тере, святы́х сла́вных и всехва́льных Апо́стол, (и святаго, егоже есть храм, и святаго, егоже есть день), святы́х и пра́ведных богооте́ц Иоаки́ма и А́нны, и всех святы́х, поми́лует и спасе́т нас, я́ко благ и человеколю́бец.
Лик: Ами́нь.
Иерей, благословляя отроки крестом, глаголет:
Благослове́ние Госпо́дне на вас, Того́ благода́тию и человеколю́бием, всегда́, ны́не и при́сно и во ве́ки веко́в, ами́нь.
Посем отроцы целуют святый крест. Иерей же кропит их освященною водою.